د مشورتي بورډ غړو د کندهار ښاروال سره د همږغۍ ناسته وکړه!

د کندهار ښاروالۍ د غونډو په تالار کي د مشورتي بورډ غړو د کندهار ښاروال حاجي ملا حکمت الله اخند سره د همږغۍ ناسته وکړه.

د همږغۍ په موخه یاده غونډه چي د کندهار ښاروال په مشرۍ جوړه سوې وه، پکښي د کندهار ښاروالۍ د شوراګانو عمومي مدیر، د مشورتي بورډ مرستیال او منشي په شمول د بورډ ټولو غړو ګډون کړئ وو.

د همږغۍ دغه غونډه چي د قران کریم په څو مبارکو ایاتونو سره راپیل سوه، په پیل کي د شوراګانو عمومي مدیر مولوي آغا صاحب د مشورتي بورډ غړو د معرفت ترڅنګ د بورډ پر تشکیل او د همدې بورډ په داخل کي د پنځو کمېټو لکه: د ښاري حکومتولۍ، د عوایدو، اقتصادي پراختیا، د ښاري خدماتو د پراختیا، شکایاتو ته د رسېده ګي او د ښاري آمنیت او خوندیتوب کمېټې په اړه مفصل معلومات له ښاروال سره شریک کړل.

ورپسې د کندهار ښاروال ملا حکمت الله اخند ټولو راغلو غړو ته ښه راغلاست ووایه او ددې مشورتي بورډ پر ایجاد او لاسته راوړونو باندي خوښي څرګنده کړل او د هر ډول همکارۍ ډاډ ئې ورکړ.

نوموړي زیاته کړه ( چي اس./ل/امي ن/.ظام دا یو نعمت دی، چي الله جل جلاله موږ ته راکړئ دی او باید شکر ئې ادا کړو او داسي نظ/.ام په ټوله دنیا کي نسته او ددې نظام تخریب کوونکي به ناکام وي) نوموړي دا هم وویل چي کندهار ښار به داسي جوړوو، چي نورو ولایتونو ته یوه نمونه وي.

د ښاروال صاحب تر وینا وروسته د مشورتي بورډ مرستیال قاري سعید محمد د مشورتي بورډ د تیرو مجالسو موضوعات لکه په ښار کي د پاکو اوبو برابرول، دنوو جوړ سوي سړکانو ساتنه او د ښار زرغونتیا او سرسبزۍ په برخه کي د نوو نهالانو د ایښوولو په اړه معلومات له ښاروال سره شریک کړل.

د همږغۍ ددې غونډي په وروستیو شېبو کي د مشورتي بورډ غړو هم خپل وړاندیزونه او پوښتني و ښاروال صاحب ته وړاندي کړې او په دې سره یاده غونډه د دعاء په ویلو سره پای ته ورسېده.

په درنښت

د کندهار ښاروالۍ

د ويب سايټ مديريت