د کندهار ښار په ديارلسمه ناحيه کي د ۸۵۰ متره کانال د رغولو چاري راپيل سوې!
کندهار ښاروالۍ داځل د ښار په ديارلسمه ناحيه، پنځم ګذر کي د ميرزا احمد خان په کلاچه کي د يو بل مهم کانال او دوو پلچکانو د اساسي رغولو چاري راپيل کړې.
دغه کانال ۸۵۰ متره اوږدوالی، د ديوالونو په شمول ۴ متره بردوالی او د دوه متره په جګوالي سره په اساسي او معياري ډول رغول کيږي.
د دغه مهمي پروژې د رغولو چاري اوس فعلا راپيل سوې او پاته کارونه به يې د ۵ مياشتو په موده کي بشپړسي.
په ياده رغنيزه پروژه کي هره ورځ ۷۰ کسانو ته د کار کولو زمينه برابره سوې ده چي ۱۰ کسان په مسلکي ډول او ۶۰ کسان په غيري مسلکي ډول کار کوي.
د يادوني وړده چي دغه کانال د ميرزا احمد خان کلا چي د وروستۍ برخي څخه شروع بيا د زابر تر غاړي پوري رغول کيږي.
د همدې مهم کانال په رغولو سره د سيمي خلګو زياته خوښي وښودل او دکندهار ښاروالۍ ددې مهم ګام څخه ئې ځانګړې مننه وکړل.
