کندهار ښاروال د اقتصاد عالي شورا په څوارلسمه غونډه کښي د ویډیو کنفرانس له لاري ګډون وکړ
د افغانستان د اسلامي جمهوریت د جمهور رئیس محمد اشرف غني په مشرۍ د اقتصادي عالي شورا غونډه نن له غرمې مخکي په ارګ کي جوړه سوه، چي په کښي ۵۱ سوداګریزونو شرکتونو ته د ځمکو پر وېش، د کجکي بند د دویم فاز پروژې د ارزونې او کوچنیو متشبثینو ته د هڅونکې بستې پر جزئیاتو بحث وسو.
جمهور رئیس محمد اشرف غني ۵۱ شرکتونو ته په صنعتي پارکونو کې د ځمکو وېش په پرنسیپ کې تائید کړ، د ښار جوړولو او ځمکو، د صنعت او سوداګرۍ او د کرنې وزارتونه او د پانګونې اسانتیا واحد یې موظف کړل چې پانګوالو ته د ځمکو د وېش څرنګوالی په هر اړخیز ډول وارزوي.
جمهور رئیس مالیې وزارت ته هدایت وکړ چي د راتلونکي کال په بودجه کې د موسی قلعه برېښنا بند او د هلمند ولایت نهر سراج کانال ته لومړیتوب ورکړي.
همدا راز جمهور رئیس محمد اشرف غني د کوچنیو متشبثینو د هڅونې او پیاوړتیا طرحه په پرنسیپ کې تائید کړه او د افغانستان بانک ته یې دنده وسپارله چې کوچنیو متشبثینو ته د هڅونې لپاره عملي میکانېزم او طرزالعمل ترتیب او عملي کړي.
