د کندهار ښاروال انجینر محمد رفیع حیات د کندهار ولایت د هبیتات موسسې له مشر او استازو سره وکتل !
په دې کتنه کي چي د کندهار ښاروالۍ تخنیکي ټیم هم ګډون کړی وو، د ځینو قراردادي شرکتونو پر ستونزو، کارونو او پلانونو وږغېدل .
کندهار ښاروال انجینر محمد رفیع حیات په کندهارکي د روانو پروژو د ښه ترسره کیدو لپاره د کندهار ښاروالۍ او هبیتات موسسې همږغي وستایل او زیاته یې کړه چي هر لوی مصرف باید د اوږمهالي ګټي لپاره وي او خلک یې له خدماتو ګټه واخلي او ساتنه یې وکړي .
ښاغلي حیات وویل چي په کندهار کي د بې سرپرسته مېرمنو لپاره به د هبیتات موسسې سره په همږغۍ د ۱۲ ناحیې، ۷ ناحیې او ۲ ناحیې لپاره ځیني پروژې په لاره ولوېږي چي مېرمني وکولای سي ددې امکاناتو په ذریعه لاسي توکي جوړ کړي او د دې توکو د ښه بازار تر څنګ به هغوئ ته د کار زمینه هم برابره سي.
په دې پروژو کي به یادو ناحیو مېرمنو ته د کالیو جوړولو ماشینونه، د کیک پخولو داشونه او شامپو جوړولو ماشینري ورکول سي.
دلته د ځینو ناحیو د رغنیزو پروژو په اړه هم خبري وسوې چي د چریانو د سر پټول، ځینو سیمو ته د سولر هندارو جوړول او یو لړ نور ښاري خدمات پکښي شامل وه .
د کندهار د هبیتات موسسې ریس سید نادرشاه زغم د کندهار ښاروالۍ له ټولو هغه همکاریو مننه وکړه چي د هبیتات موسسې سره یې د پروژو د تطبیق پر مهال ترسره کړي دي.
په وروستیو کي کندهار ښاروال انجینر محمد رفیع حیات د کندهار رغنیزه پراختیا لومړیتوب وګنئ او ددې لپاره یې د لا همکارۍ او همږغۍ غوښتنه وکړه .
