د کندهار ښار په ختيځه برخه کي ښار ته د خولي دروازه په اساسي او معياري شکل جوړيږي
کندهار ښاروالۍ د خپلو انکشافي کارونو په دوام دا ځل دښار په ختيځه برخه، دامان ولسوالي کي ښار ته د دخولي دروازې د جوړولو چاري په اساسي او معياري شکل پيل کړې.
دا دروازه چي د سلام مخابراتي شرکت په مالي ملاتړ جوړيږي تقريبا ۸۰ متره اوږدوالی، ۱۲ متره پلنوالی او څلور منزله تعمير لري چي پکښي خوړنځای، د امنيت اطاقونه سرسبزي او ګڼي نوري آسانتياوي پکښي شاملي دي چي ټولي ساختماني چاري به يې د ۸ مياشتو په موده کي بشپړي سي.
د يادي دروازې د افتتاح مراسم نن دوشنبه په داسي حال کي ترسره سوه چي پکښي د کندهار ښاروال مولوي عبدالله روحاني صاحب، د مخابراتو رئيس، د افغان ټليکام او سلام مخابراتي شبکې رئيس، د فوائد عامې رئيس، د کندهار امنيه قمندان او نورو مسؤلينو ګډون کړی وو.
ددې دروازې د افتتاح په مراسيمو کي د کندهار ښاروال مولوي عبدالله روحاني صاحب وويل چي د يادي دروازې په جوړيدو سره به د کندهار لرغوني ښار ته لاښکلا ورپه برخه سي او هم به د ښار حدود وټاکل سي، هغه په خپلو خبرو کي وويل چي وخت او امکاناتو ته په کتلو به دښار لپاره نوري دخولي دروازې هم جوړوو.
د ښاروالۍ ددې مهم اقدام څخه د کندهار ښار اوسېدونکو او هم ددې لاري تلونکو کسانو زياته خوښي وښودل او دداسي ورته اقداماتو غوښتنه يې وکړل.
