د دوهمي او دریمي ناحیو خلګو ته حساب ور کړل سو
د کندهار ښاروالي د غونډو په تالار کي پر داسي مهال چي د ښاري حکومتولۍ رئیس عبدالواحد شاه هاشمي هم حاضر وو د دوهمي ناحیې او درېیمي ناحیې خلګو ته د کندهار ښاروالي د شفافیت او حساب ور کولو مدیر سید محمد ګل اغا د تیري یوې میاشتي د عوایدو، مصارفو، سرسبزۍ او تنظیف چارو په اړه حساب ورکړ.
د ښاري حکومتولي رئیس عبدالواحد شاه هاشمي د غونډي ګډونوالو ته د ښه راغلاست ویلو تر څنګ د شفافیت پر ارزښت، د ښاري حکومتولۍ پر پیاوړتیا د خلګو او ښاروالي تر منځ د شفافیت او حساب ورکولو پر ګټو او نورو مهمو برخو باندي خبري وکړې د ښاغلي هاشمي په خبره د دې ډول غونډو څخه یې هدف د ښاریانو د ستونزو، مشکلاتو، وړاندیزونو او پیشنهادونو اورېدل او ورته حل لاره پیدا کول دي د خلګو او ښاروالي تر منځ قوي همږغي او د خلګو راګډول په ښاري تصامیمو کي دي، وروسته د شفافیت او حساب ورکولو مدیر سید محمد ګل اغا وویل په تېره یوه میاشت کي د دوهمي ناحیې څخه د کورونو د صفایي له درکه ۱۰۷۸۸۶ افغانۍ او د دُکانونو د صفایي محصول له درکه ۲۹۴۴۷۳ افغانۍ چي جمله ۴۰۲۳۵۹ افغانۍ کیږي د کندهار ښاروالي بانګي حساب ته تحویل سوي دي. ددې تر څنګ آغا صاحب وویل د درېیمي ناحیې د کورونو د صفایي محصول له درکه ۲۲۶۰۴۴ افغانۍ او د دکانونو د صفایي محصول له درکه ۲۵۹۸۰۳ افغانۍ چي جمله مبلغ ۴۸۵۸۴۷ افغانۍ کیږي د درېیمي ناحیې څخه د یوې میاشتي په جریان کي د کندهار ښاروالي بانګي حساب ته تحویل سوي دي.
د دې تر څنګ د کندهار ښاروالي د شفافیت او حساب ورکولو مدیر د دوهمي ناحیې او درېیمي ناحیې له قومي مشرانو، دګذر وکیلانو او اوسېدونکو څخه غوښتنه وکړه چي خپل د صفایي ټکسونه د روان مالي کال په جریان کي تحویل کړي تر څو د ښاري خدماتو له ځنډ سره مخ نسي او د بلي خوا د ناحیو د عوایدو کسر له منځه تللی وي، د ښاغلي اغا صاحب په خبره اوس دوهمه او درېیمه ناحیه د عوایدو له درکه کسر لري چي دده په وینا باید ژر تر ژره دا کسر له منځه ولاړ سي ځکه دده په خبره ښاروالي یوه تصدي ده او خپلي ټولي اړتیا وي د ښاریانو له عوایدو پوره کوي.
د غونډي په وروستۍ برخه کي د ګډونوالو سوالونو ته هم جوابونه وویل او د قران پاک په ایاتونو سره یاده غونډه پای ته ورسېدل.
