په دوولسمه ناحيه کي د لس مليونه افغانيو پروژه پلې کېږي
يک شنبه/۶ – سلواغه – ۱۳۹۸
د کندهار ښار د دوولسمي ناحيې په اووم/ نجات ګذر کي د کندهار ښاروالي له خوا د ولسي تړون پروګرام تر چتر لاندي يوه لويه انکشافي پروژه پلې کېږي.
د دې پروژې له لاري يو سړک ډامبرېږي، چي ۸۰۰ متره اوږدوالی او ۸ متر بر به ولري.
دغه راز د دې پروژه له لاري دوه پلچکان هم جوړېږي، چي يو به يې ۱۷،۶ متر اوږدوالی او دوه متره بر او بل به يې ۱۲،۶ متره اوږدوالی او دوه متره بر ولري. د ۱۰،۲ متره اوږدوالي او ۸ متره بر لرونکي دوې کاز وې جوړول هم د دې پروژې يوه برخه ده.
په دې پروژه کي د ۲۴۶۲ مترو په اوږدوالي د چرۍ جوړول هم شامل دي. پر دغه پروژه چي سلګونه کورنۍ به يې مستقيماً له ګټو څخه برخمني سي، څه کم لس مليونه افغانۍ لګښت راځي. د خلکو له خوا انتخاب سوي او د خلکو تر مستقيم نظارت لاندي پلي کېدونکي دغي پروژې کار تر راتلونکو لسو ورځو پوري پيلېږي او په شپږو مياشتو کي بشپړېږي. دا پروژه د يوې آزادۍ داوطلبۍ په پايله کي يوه خصوصي شرکت ته په قرارداد ورکول سوې ده.
