ښاروالي دښاریانو پوښتنو ته جواب ویونکې ده
دغه څرګندوني د کندهار ښاروالي د ښاري حکومتولي رئیس عبدالواحدشاه هاشمي په هغه غونډه کي وکړې کوم چي د ښار د څلورمي او پنځمي ناحیې اوسېدونکو ته د شفافیت او حساب ورکولو په موخه جوړه سوې وه.
هاشمي وویل شفافیت او حساب ورکول د دولت یو اساسي او مهمه دنده ده، شفافیت او حساب ورکول ولسونو ته د حق غوښتني د فرهنګ په معنی دی شفافیت او حساب ورکول د ولسونو باور په دولت باندي زیاتوي، نو ځکه کندهار ښاروالي تل کوښښ کوي چي په ټولو تر سره کېدونکو اجراتو کي خپلو ښاریانوته جواب ویونکې واوسي.
په غونډه کي د څلورمي او پنځمي ناحیې څخه د ګذرونو وکیلان، ځوانان، قومي مشران او د نظر خاوندانو ګډون کړی و. د کندهار ښاروالي د شفافیت او حساب ورکولو مدیر سید محمد ګل اغا د تیري سرطان د میاشتي د عوایدو، مصارفاتو د روانو رغنیزو چارو او نورو مهمو موضوعاتو په اړه هر اړخیز معلومات د غونډي ګډونوالو ته ورکړه او د دواړو ناحیو د مشرانو، وکیلانو، متنفذینو او سېدونکو څخه یې وغوښتل چي د ناحیو د عوایدو د کسر په لمنځه وړلو کي د خپلو اړوندو ناحیو د آمریتونو سره همکاره پاته سي تر څو کندهار ښاروالي وکولای سي په یادو ناحیو کي ددوي دعوایدو له طریقه بهتره ښاري خدمات وړاندي کړي.
