کندهار والي د مرکز ادارې څخه راغلي پلاوي او یو شمېر نورو مسؤلینو په ملتیا د جامع عمر کمپلکس چاري وارزولې
کندهار والي حیات الله حیات د سې شنبې په ورځ د جمهوري ریاست د چارو ادارې د ملي پرمختیايي شرکت د تدارکاتو رئيس مسري خان همت، د افغان ساختماني دستګاه شرکت رئیس او د جامع عمر پروژې تطبیقوونکو، کندهار ښاروال انجنیرمحمدرفیع حیات او یو شمېر نورو مسؤلینو سره لومړي ولایت مقام کي وکتل او د یو شمیر تخنیکي او مسلکي وړاندیزونو او معلوماتو تر شریکولو وروسته یې د ساحې څخه د نژدې لیدني په موخه د جامع عمر کمپلکس ته ولاړل او هلته یې د یاد کمپلکس د ټولو چارو څخه له نژدې لیدنه ترسره کړه، تر څو د یادي پروژې اړوند ټول مسایل د کابل څخه راغلي پلاوي ته په واضح توګه تشریح او هغوی ته دقیق معلومات په لاس ورکول سي.
یادو مسؤلینو د جامع عمر کمپلکس له ټولو نقشو، دریو پوړونو، د اوداسه ځایونو، برېښنا سیستم، پارکېنګ، اوبو ذخیرې، تدریسي خونو، شنې ساحې او ګڼو نورو برخو په جلا، جلا توګه لیدنه وکړه او پر مهال یې د پروژې تطبیقوونکو لخوا د هري برخي په اړه هر اړخیز معلومات ورسره شریک سول.
کندهار والي د لیدني پر مهال د دغه کمپلکس د جوړېدو چارو پر بیا پیل ټینګار وکړ او زیاته یې کړه، د جامع عمر د مسلکي او تخنیکي سروې ترڅنګ دي د جامع د ډیزان د اصلاح په موخه هم مرکزي ادارې سره وړاندیزونه شریک سي ځکه په وینا یې د عصري معمارۍ مطابق دي په یاده جامع کي ټولي اړتیاوي په نظر کي ونیول سي او پر وخت دي چاري بشپړي سي.
ښاغلي حیات وویل، که څه هم د یادي جامع د دریو واړو فازونو ساختماني چاري بشپړول زیات وخت نیسي، خو هڅه باید دا وي، چي د اول فاز چاري په راتلونکو څو میاشتو کي بشپړي سي، څو جامع د لمونځ کوونکو پر مخ خلاصه او د کندهاري ولسونو د کلونو هیله او زموږ ګد هدف په حقیقت بدل سي.
د لیدني په پای کي د ښاروالۍ، ښارجوړولو او ځمکو ریاست، ملي پرمختیايي شرکت، افغان ساختماني دستګاه شرکت او د پروژې تطبیقوونکو ګډه کمېټه وټاکل سوه، چي د سبا ورځي تر پای پوري به د پروژې د اوسني وضعیت، شته امکاناتو، پاته چارو د بشپړېدو لپاره د برآورد، مصرف سویو پیسو، شته ستونزو او ننګونو په اړه یو واضح او مسلکي راپور او جامع د ډیزان د اصلاح په موخه مسلکي وړاندیزونه چمتو او ولایت مقام سره به یې شریکوي، څو مرکزي ادارې سره هم شریک او ژر تر ژره د کمپلکس د لومړي فاز پاته چاري پیل سي.
