د ښاري حکومتولۍ په برخه کي د کندهار او هرات ښاروالیو پرتله کېږي
د کندهار ولایت مقام د ټولنیزو چارو مرستیال حاجي اغالالي دستګیري په مشرۍ د سې شنبې په ورځ د کندهار او هرات ښاروالیو ترمنځ د دوه اړخیزه همکاریو د سوي تفاهملیک د تطبیق په موخه غونده جوړه سوه، چي هرات ته د ښاروالیو د همږغۍ او علمي سفر کمېټې غړو او یو شمېر نورو مسؤلینو پکښي ګډون کړی وو.
په پیل کي هرات ته د ښاروالیو د همغږۍ او علمي سفر کمېتې غړو یو په بل پسې خبرو کي د سوي تفاهملیک د تطبیق په برخه کي د سویو اجرااتو راپور شریک کړ او د راتلونکي لپاره یې خپل وړاندیزونه او پلانونه شریک کړل.
د دوی د راپورونو تر اورېدو وروسته د ولایت مقام د ټولنیزو چارو مرستیال حاجي اغالالي دستګیري وویل، د کندهار او هرات ښاروالیو ترمنځ د کلتوري، اقتصادي، بیارغوني، تعلیمي او تحصیلي، تجارتي، او ټولنیزو همکاریو تفاهملیک د دواړو ښارونو ترمنځ اړیکي تر بل هر وخت پیاوړې کړې دي او په مرسته یې د دواړو لوریو ترمنځ بیلابیلو برخو کي تجربې شریکي سوې دي.
ښاغلي دستګیري زیاته کړه، اوس د سیمه ییزو ارګانونو خپلواکه اداره غواړي، د خویندو ښاروالیو پرتله ترسره او د ښاري حکومتولۍ د پیاوړتیا په برخه کي لا ډېر ګامونه اوچت کړي، چي په دې برخه کي باید بېلابېلي کمېټې تشکیل او اړونده برخه کي لازم اجراات ترسره کړي.
د غونډي په پای کي پرېکړه وسوه، چي د هرات او کندهار ښاروالیو تر منځ د همکارۍ تفاهم لیک مطابق به تر سبا پوري د بېلابېلو ادارو ګډي کمېټې ټاکل کېږي، څو خویندي ښاروالۍ سره پرتله او مختلفو برخو کي لا ډېر پرمختګونه رامنځته سی.
