د مشورتي شورا غړو د ښاري نظم د ټینګښت په موخه نوبتي مجلس ترسره کړی!
کندهار ښار کي د بشپړ ښاري نظم د ټینګښت په موخه دمشورتي شورا او ښاري نظم کمېسیون غړو ترمنځ نوبتي مجلس ترسره سو.
په دې مجلس کي لومړی په ښار کي پر هغو ستونزو بحث وسو، چي د ښاري بې نظمیو سبب ګرځېدلي وه او د ښاري نظم لپاره ئې زیان اړولی و.
د مشورتي شورا غړو ټینګار وکړ چي د مارکېټونو تنظیم آمریت او د ښاري نظم کمېسیون له لوري د ښاري نظم د ټینګښت لپاره ترسره کېدونکی نظارت او څارنه باید په اساسي توګه ترسره سي.
هغوی وړاندیز وکړ چي د ښاري نظم د اخلال رامنځته کوونکو لاملونو لپاره دي د حل بدیلي لاري پیدا سي، تر څو زموږ ښار د پوره نظم څخه برخمن سي.
په ورستیو شېبو کي د مشورتي شورا غړو د بشپړ ښاري نظم د لا پراخولو او د ښاري نظم د فرهنګ رواجولو په موخه دعامه پوهاوي ترڅنګ خپل وړاندیزونه د ښاري نظم کمېسیون له غړو سره شریک کړل او د ښاري نظم کمېسیون له خوا ورته د اطمینان ډاډ ورکړل سو.
د یادوني وړ ده چي مشورتي شورا د کندهار ښاروالۍ تر چتر لاندي فعالیت ترسره کوي، چي د پوهنتون استادان، اصناف، دیني علماء، ګذر وکیلان، متنفیذین او ځوانانو استازي په کښي شتون لري.
