د ښاري خبري اتري/ ګفتمان شهری لويه غونډه جوړه سوه
يکشنبه/۱۸- کب - ۱۳۹۸
په کندهار کي د سيمه ييزو ارګانونو ادارې د ښارواليو معينیت د ښاري حکومتولۍ عمومي رياست له هدايت او اجنډا سره سم د ښاري خبرو اترو پروګرام د کندهار ښاروالي په کوربتوب جوړ سو. په دغه مناسبت د کندهار ولايت مقام د شاه آمان الله د غونډو په تالار کي لويه غونډه رابلل سوې وه، چي ټول ټال ۵۰۰ تنو په کښي ګډون کړی و.
د غونډي برخه وال کندهار والي، کندهار ښاروال، د سکټوري ادارو رئيسان او استازي، د مشورتي بورډ غړي، د ګذر وکيلان، د ښاري ټولنو استازي، مدني فعالان، ښځي، د کندهار ښاروالي د ښاري حکومتولۍ رياست کارکوونکي او عام ښاريان وو.
غونډه کندهار ښاروال انجنير محمد رفیع حیات په خپلو څرګندونو پرانيسته، ګډونوالو ته يې هرکلی ووايه او د ښاري خبرو اترو پروګرام موخي يې ورته واضح کړې. ښاروال وويل، له دې پروګرام څخه موخه دا ده چي د ښاريانو مشارکت تأمين سي او ښاري او مسؤلين مخامخ د خپلو ستونزو او چارو په اړه له يو بل سره خبري وکړي.
ورپسې کندهار والي حيات الله حيات څرګندوني وکړې. هغه د کندهار ښاروالي له خوا د ښاري خبرو اترو پروګرام وستايه او دا يې د مردم سالارۍ د تأمين په برخه کي لوی ګام وباله. والي هيله څرګنده کړه چي د ښاري خبرو اترو دغه فرهنګ دوام پيدا کړي.
ورپسې د پروګرام له اجنډا سره سم لومړی فنل جوړ سو، چي کندهار والي، کندهار ښاروال، د امنيې قوماندانۍ مرستيال، د قول اردو استازي او د سکټوري ادارو ځينو رئيسانو ګډون کړی و. د فنل هر برخه وال پنځه دقيقې خپلي لاسته راوړني بيان کړې، وروسته د پروګرام برخه والو ته موقع ورکړه سوه چي خپلي طرحي، اندېښنې، پوښتني او وړانديزونه مطرح کړي. ورپسې د کرونا وايروس په اړه د کندهار د عامي روغتيا رياست استازي ډاکټر فدامحمد سحر معلومات ورکړل او ويې ويل چي د کندهار د روغتيا اداره د دغي ناروغۍ د مخنيوي له پاره کافي صحي تدابير لري.
د چايو تر دمې وروسته د پروګرام له اجنډا سره سم د اقتصادي پرمختيا او ښاري حکومتولۍ په اړه فنل جوړ سو، چي د کندهار د اقتصاد رئيس، د برېښنا رئيس، د کانونو رئيس، د سوداګرۍ رئيس، د چاپېريال ساتني رئيس، د روغتيا رئيس، په کښي حضور درلود.
ټولو د خپلو لاسته راوړنو او پروګرامونو په اړه په وار سره معلومات ارائه کړل او ورپسې ګډونوالو ته بلنه ورکړه سوه چي خپلي د کندهار د اقتصادي پرمختيا او ښاري حکومتولۍ د ودي په موخه خپلي طرحي، اندېښنې او پوښتني مطرح کړي. د ګډونوالو پوښتني ته ځوابونه وويل او فنل پر ټاکلي وخت پای ته ورسېد.
د ښاري خبرو اترو پروګرام په وروستيو کي له اجنډا سره سم کندهار والي حيات الله حيات د پروګرام د ارزوني په موخه وينا وکړه. ښاغلي حيات دا پروګرام د مسؤلينو او عامو ښاريانو تر منځ د پرانيستو خبرو اترو او تفاهم خورا ښه فرصت وباله او ويې ويل چي د پروګرام په لړ کي سوي ژمني، پرېکړي او تر لاسه سوي طرحي به عملي کېږي.
پروګرام له اجنډا سره سم د دعائيې په ويلو پای ته ورسېد او ګډونوال د غرمې ډوډۍ تر خوړلو وروسته خپلو ځايونو ته ستانه سول.
