د ښار د ښکلا او زرغون چاپیریال رامنځته کولو لپاره د کندهار ښاروالۍ هڅي دوام لري!
چهار شنبه ۲۷ / ۱ / ۱۴۰۴ ه ش کال
کندهار ښاروالۍ د ښاري چاپیریال د زرغونتیا، ښکلا او پاکوالي د پراخولو په موخه خپلي هڅي چټکي کړي دي. د دوشنبې په ورځ، د سرسبزۍ آمریت لهخوا د ښار په اوله، دوهمه، دریمه، شپږمه، اتمه او څوارلسمه ناحیه کي د نوو نهالانو ایښودل، د ګلانو غوچهکاري، صفائي او پر ګلدانونو باندي د ګلانو او نهالانو د اوبولو چاري په منظم ډول ترسره سوي او لا هم جریان لري.
د کندهار ښاروالۍ د سرسبزۍ آمریت د خپل پلان له مخي هڅه کوي هغه ساحې چي ښکلا او سرسبزي ته اړتیا لري، د ښاریانو په همکارۍ به په اساسي او معیاري ډول زرغونې او ښکلي کړي. همدا راز د ایښودل سوو نهالانو او ګلانو پالنه او ساتنه به هم په منظمه توګه ترسره کوي.
درنو ښاریانو!
له تاسو څخه هیله کیږي چي د ښار په بېلابیلو سیمو کښي د زینتي ګلانو، نهالانو او زرغونو ساحو په ساتنه او پالنه کي له کندهار ښاروالۍ سره پوره همکاري وکړئ ترڅو زموږ او ستاسي ښار له زرغون او پاک چاپیریال څخه برخمن سي.
