د سیمه ییزو ارګانونو خپلواکي ادارې د ښاروالیو معین د ولسي تړون ملي برنامې له مسولینو سره وکتل
د سې شنبې په ورځ وروسته له غرمې د سیمه ییزو ارګانونو خپلواکي ادارې د ښاروالیو چارو معین د ولایت مقام د مرستیال عبدالحنان منیب او کندهار ښاروال انجینرمحمد رفیع حیات په ملتیا د ولسي تړون ملي برنامې له مسؤلینو سره وکتل او پر مهال یې په کندهار ښار کي د ولسي تړون پروګرام اړوند ستونزو په اړه ورڅخه معلومات وغوښتل.
د غونډي په پیل کي کندهار ښاروال انجینر محمدرفیع حیات وویل، په کندهار کي د ولسي تړون پروژې ډیري ښه رواني دي، چي د ۲۰۰ شوراګانو پروژې تطبیق سوي او د ۱۰۰ هغو چاري عملاً جریان لري او په خبره یې ډیري کمي پروژې سته، چي تخنیکي ستونزي لري، ولي د حل لپاره یې مکملي هڅي رواني دي.
حیات وویل، چي د ولسي تړون برنامې په یوه برخه کي د ټولنیزو او چاپیریالي برخو فورمې موجودي دي، چي د تولنیز اړخ فورمې یې باید عام خلک ډکي کړي، تر څو د ولس رضایت ددې لاري معلوم سي او همدارنګه چاپیریالي برخه کي هم د ولایت مقام رهبرۍ د قاطعیت له مخي په ښار کي د زرغونو ساحو د ساتني پراخي هڅي او ملاتړ موجود دي، تر څو زرغونې ساحې خوندي سي او هیڅ ډول بې پروایي ونه سي.
د ښاروال په خبره، ۳۱۸ پروژې په شوراګانو او ۱۰۹ پروژې په ګذرونو کي موجودي دي، چي ۲۲۲ پروژې بشپړي سوي او نوري د تطبیق په حال کي دي.
د ولایت مقام د ټولنیزو چارو مرستیال عبدالحنان منیب د خپلو خبرو پر مهال وړاندیز وکړ، چي د ولسي تړون په چوکاټ کي بیخي ډیر کار سوی او لا هم پروژې رواني دي او لازمه یې وګڼل، چي د یادو پروژو څخه عام ولس خبر سي، نو په همدې موخه یې د ولسي تړون برنامې له مسؤلینو وغوښتل، چي د ولس په خبرولو کي هم هڅي وکړي او د دوی لپاره د ترسره کیدونکو خدماتو په اړه باید معلومات ولري.
وروسته د سیمه ییزو ارګانونو خپلواکي ادارې د ښاروالیو چارو معین روح الله نیازي د خپلو خبرو پر مهال وویل، چي کندهار ته د راتګ موخه یې د ولسي تړون پروژو څخه څارنه او د ولس د رضایت ارزیابي کول دي او په خبره یې غوښتل یې معلومه کړي، چي د خلکو سره ددې پروګرام اړوند څه ډول تصور موجود دی، تر څو د مثبتي نتیجې د ترلاسه کولو وروسته مرکز کي تمویلوونکي ادارې دې ته وهڅوي، چي په یاده برخه کي نوره همکاري وکړي.
ښاغلي نیازي وویل، چي کندهار ښاروالي د پروژو په تطبیق کي د ولسي تړون سره ښه همږغي ساتلې او تر اوسه د جدي ستونزي نښه نه لیدل کیږي.
هغه د خبرو په دوام یادونه وکړه، چي د پروژو اړوند باید په ډیره ساده توګه د ولسونو سره معلومات شریک سي، تر څو ولس د پروژو اړوند مکمل معلومات ولري.
ښاغلي نیازي یادونه وکړه، چي پروژې باید داسي وي، چي ډیرو خلکو ته د ډیر وخت لپاره ګټه ورسوي او خلک باید ورڅخه رضایت ولري، تر څو د حکومت اعتبار د خلکو په منځ کي ډیر سي او خلک په خپل حکومت باور وکړي.
په غونډه کي پر یو شمیر نورو موضوعاتو هم خبري وسوې او د دوه اړخیزو همکاریو ډاډ وړاندي سو.
