د کندهار ښاروالۍ له لوري د فوټسال د لوبو ټورنمینټ نن رسماً پیل سو!
کندهار ښاروالي د ښاروالیو د معینیت د رسمي هدایت په اساس نن د پنج شنبې/۹-۲-۱۴۰۰ په ماښام د کندهار په ملي جمنازیم کي د کندهار ښاروالۍ او د ( ۱۵ ) ناحیو تر منځ د فوټسال د لوبو ټورنمینټ پيل کړ.
د ټورنمینټ په مراسمو کي مرستیال ښاروال عتیق الله حمید، د ښاري حکومتولۍ رئیس عبدالواحد شاه هاشمي، سکتوري او تخنیکي رئیس جاوید احمد میوند، د ګذر وکیلانو او ځوانانو پراخ ګډون کړی و.
په پیل کي مرستیال ښاروال وویل، یاد ټورنمینټ د ( ۱۶ ) لوبډلو څخه جوړ سوی دئ، چي د هري ناحیې په سطحه یوه لوبډله، چي د پنځلسو ناحیو څخه ( ۱۵ ) لوبډلي او یوه د کندهار ښاروالۍ د فوټسال لوبډله ده، چي له نن څخه شروع تر اتو ورځو پوري به جریان ولري.
 |
 |
 |
مرستیال ښاروال زیاته کړل، چي د یاد ټورنمینټ جوړولو څخه ئې هدف د ټولنیزي سولي رواجول او تقویت، د سپورټ د ودي او پراختیا تر څنګ ئې د ښو لوبغاړو پېژندل او تشویقول دي.
په پای کي مرستیال ښاروال د راغلو مېلمنو، ځوانانو او په ټورنمینټ کي د برخه اخیستونکو لوبډلو څخه مننه او کورودانی وکړ.
پاملرنه: لومړنۍ لوبه د کندهار ښاروالۍ او د (۷) ناحیې تر منځ تر سره کیږي.
 |
 |
 |
