په ښاروالۍ کي د مالي مدیریت واحد سیسټم یا IFMS پرانستنه وسوه!
د IFMS د پرانیستني په دې مراسمو کي د سیمه ایزو ارګانونو ادارې د ښاروالیو معین روح الله نیازي، کندهار والي حیات الله حیات، کندهار ښاروال انجینر محمد رفیع حیات او د بېلابیلو ادارو مسوولینو برخه اخیستې وه . په پیل کي د کندهار ښاروال راغلو میلمنو او ګډونوالو ته ښه راغلاست ووایه او د سیمه ایزو ارګانو له ادارې یې مننه وکړه چي د یاد ورژن پنځم سیسټم یې په ښاروالۍ کي فعال کړ. نوموړي د عوایدو په را ټولولو کي د روڼتیا په اړه ډاډ ورکړ او له ولسونو یې هم د همکارۍ کولو غوښتنه وکړه. د سیمه ایزو ارګانونو ادارې د ښاروالیو معین روح الله نیازي په خپله وینا کي وویل چي دوئ د هیواد په لویو ښارونو کي دا سیسټم فعالوي، چي نن یې دلته هم پرانستنه وکړه. د نوموړي په خبره په دې سیسټم کي به زرګونه کورونه ثبت سي او د کندهار والي سربېره به یې په مرکز کي هم مسوولین څارنه کوي. د سیمه ایزو ارګانونو ادارې د اداري چارو ریس محمد امین توخي ددې سیسټم په اړه د پریزنټېشن په بڼه د غونډي ګډونوالو ته معلومات ورکړل. کندهار والي حیات الله حیات د خپلي وینا پر مهال د IFMS سیسټم په پرانستنه خوښي ښوده او هیله یې څرګنده کړه چي ددې سیسټم په فعالولو به روڼتیا رامنځته او د فساد مخه به ونیول سي. په دې افتتاحیه غونډه کي د کندهار ولایتي شورا ریس ، ددې شورا غړو، مدني فعالانو او ګڼو ځوانانو برخه اخیستې وه . یاده دي وي چي له تېرو پنځلس کلونو راهیسي په ښاروالیو کي یو زوړ سیسټم موجود وو چي ددې نوي سیسټم IFMS په رامنځته کېدو سره به د ښاروالۍ په بیلابیلو برخو کي ښه والی منځته راسي.
