کندهار ښاروال: لله الحمد؛ په مجموع کي شپه په خير تېره سوه
کندهار ښاروال:
لله الحمد؛ په مجموع کي شپه په خير تېره سوه
۲۲، جدي، ۱۳۹۸
کندهار ښاروال انجنير محمد رفيع حيات وايي، سره له دې چي برايي ټوله شپه دوامداره باران واورېد، خو له نېکه مرغه د لوی خدای (ج) په فضل، د ښاروالي د اضطراري کمېټې د جدي مراقبت او د بااحساسه ښاريانو د همکارۍ له برکته په کندهار ښار کي د يادولو او اندېښنې وړ ځاني يا مالي زيان نه دی اوښتی. تېره شپه کندهار ښاروال، د ناحيو آمرين، د ناحيو کاري پرسونل، د اضطراري کمېټې کاري ډله او دوه تنه بااحساسه ځوانان ښاغلی فيض محمد فيض او ښاغلی فضل احمد محسن تر سهاره ويښ وو.
ښاغلي حيات وويل، يوازي د نهمي ناحيې په مربوطاتو کي يو کور نن سهار پر ۷ بجې نړېدلی، متأسفانه يوه مېرمن په کښي ټپي سوې وه، د ښاروالي د اضطراري خدماتو د کارکوونکو له خوا عاجل روغتون ته رسول سوې او د نوموړي کور نور ماشومان د ناحيې آمر کور ته انتقال کړي دي.
همدا راز د کندهار ښار د نهمي ناحيې په فقير بابا کوڅه کي تېره شپه يو دېوال نړېدلی و، چي د ښاروالي کارکوونکي پر وخت ور رسېدلي او د نوموړي کور په اصطلاح پرده يې خوندي کړې، د اوبو مسير يې ژر تر ژره ايله کړی او د جدي زيانونو مخه يې نيولې ده.
دغه راز د کندهار ښار د ميرويس روغتون شا ته د اوبو مسير بند سوی و، د ښاروالي د اضطراري خدماتو کمېټې په عاجله توګه رسېدګي ورته وکړه، د اوبو مسير يې ايله کړ او د ځاني او مالي زيانونو مخه يې ونيوله.
کندهار ښاروال وايي، د اضطراري خدماتو کمېټه تر هغو چي باران دوام ولري او د احتمالي زيان خطر موجود واوسي، د آماده باش په حال کي ده، ټول ښار څاري او په خپل ټول توان د زيانونو د مخنيوي هڅو ته دوام ورکوي.
