کندهار ښاروالي د ښاري نيالګيو د آبيارۍ سيسټم معياري کوي

پنج شنبه - سلواغه - ۱۳۹۸۳ /

کندهار ښاروالي هر کال په مليونونو افغانۍ د نيالګيو پر رانيولو او کښېنولو لګوي، چي له بده مرغه ځيني يې د اوبو د کموالي او د آبيارۍ د پخواني سيسټم له امله وچېږي.
سږ کال بيا کندهار ښاروالي د نيالګيو له پاره څلور مليونه افغانۍ بودجه په انکشافي پلان کي نيولې، خو سږ کال به دا بودجه د نورو کلونو په څېر د نيالګيو پر رانيولو نه، بلکي د ښاري سرسبزي د آبيارۍ سيسټم پر عصري کولو/ قطره يي کولو لګول کېږي. د آبيارۍ سيسټم عصري کول به د جنرال عبدالرازق خان جادې له ګلدان څخه شروع کېږي او په تدريجي ډول به د ښار نورو سرسبزه ساحو ته غځول کېږي. د ښاري نيالګيو د اوبولو اوسنی دوديز سيسټم له هره پلوه خورا ګران تمامېږي، له امله يې هم تر مځکي لاندي اوبه ډېري ضائع کېږي، هم تېل ډېر مصرفېږي او هم ډېر وخت او زيات بشري منابع او ټانکرونه غواړي. تر مځکي لاندي اوبو، د اضافه مصرفېدونکو تېلو او نورو منابعو د سپما، د کندهار ښار د سرسبزه ساحې پراختيا ته د زمينې برابرولو او له اوسني معاصر سيسټم سره سم د ښاري نيالګيو د آبيارۍ سيسټم برابرولو په موخه سږنی پروګرام عملي کېږي.
له همدې امله کندهار ښاروالي سږ کال پلان لري چي خپل د اړتيا وړ نيالګي د خپلو بااحساسه ښاريانو په مرسته برابر کړي. د ښار هر اوسېدونکی که له يوه څخه نيولې تر سلو پوري؛ د هر څومره نيالګيو توان ولري، د خپلي سيمي او ښار د سرسبزه کولو په موخه دي يې له کندهار ښاروالي سره مرسته وکړي. ستاسي له لوري مرسته کېدونکي نیالګي به ستاسي په حضور کي ستاسي په سيمه او هلته چي ورته اړتيا وي، کښېنول کېږي او جدي پالنه به يې کېږي. له نېکه مرغه ډېرو کندهار ښاريانو د نيالګيو په دغه کمپاين کي د خپلي ښاروالۍ مرسته کړې، چي د کندهار ښاروالي مقام يې قدرداني کوي.