د عیدګاه جادې شمال برخي سړک د جوړېدو چاري پيل سوې
د چهارشنبې په ورځ د کندهار ښاروالۍ لخوا د متوازن ښاري انکشاف رامنځته کولو پر اساس د څوارلسمي ناحیې اړوند د عیدګاه جادې سره موازي د شمال برخي سړک د جوړېدو چاري پیل سوې.
په همدې موخه جوړو سویو مراسمو کي د کندهار والي حیات الله حیات ترڅنګ ښاروال انجنیرمحمد رفیع حیات، یو شمېر نورو مسؤلینو او د سیمي اوسېدونکو ګډون کړی وو.
په مراسمو کي کندهار والي حیات الله حیات وویل، دغه سړک ۵۹۰ متره اوږدوالی، ۱۰ متره بر، د نیم متر په بر او ۹۹۰ مترو په اوږدوالي چرۍ او د ۱۵۰۰ متره په اوږدوالي پياده رو لري، چي ۸،۶ میلیونه افغانۍ لګښت پرې راځي او د کندهارښاروالي له انکشافي بودجې څخه ورکول کېږي.
ښاغلي حیات زیاته کړه، د یاد سړک رغنیزي چاري به په دریو میاشتو کي بشپړې س، چي پر مهال به یې ۹۰۰ مسلکي کارکوونکو، ۸۰۰ غیرمسلکي کارکوونکو ته د کار زمینه برابره سي او ۸۰۰ کورنۍ به په مستقیم ډول ګټه ترې واخلي.
کندهار والي د یاد سړک په جوړېدو خوښي وښوده او ویې ویل، ښاروالي لکه څنګه چي لازمه ده هغسې خدمات وړاندي کوي او خلک دي ښاروالي ته پر وخت د صفايي پیسې ورکړي، تر څو د ښاروالۍ په پرمختیايي بودجه ورته نوري پروژې هم تطبیق کړل سي.
کندهار ښاروال انجینرمحمد رفیع حیات د خپلو خبرو پر مهال وویل، ښاروالۍ د ښار په ټولو ناحیو کي متوازن انکشاف ته ژمنه ده او د عیدګاه جادي سړک په څوارلسمه ناحیه کي د ولسي تړون لومړۍ پروژ ده.
هغه د سیمي له اوسېدونکو وغوښتل، چي د پروژې په نظارت کي ورسره همکاري وکړي، تر څو چاري یې پر خپل وخت او په معیاري شکل ترسره سي.
د سیمي اوسېدونکو د یاد سړک په جوړېدو خوښي څرګنده کړه او ۱۴مي ناحیې ته یې د لا زیاتي پاملرني غوښتلو ترڅنګ له پرمختیايي پروژو خپل ملاتړ څرګند کړ.
