په کندهار ښاروالۍ کي د مکاتبو او مدارسو تمثیلي کمېټو ته د عامه پوهاوي غونډه ترسره سوه!
پنج شنبه ۲۸ / ۱ / ۱۴۰۴ ه ش کال
د کندهار ښاروالۍ دغونډو په تالار کي د ټولنیزو او کلتوري چارو آمریت له لوري د ښار د لویو مکاتبو او مدارسو تمثیلي کمېټو ته دعامه پوهاوي غونډه ترسره سوه.
یاده غونډه د قران کریم د څو مبارکو آیتونو په تلاوت پیل سوه. وروسته د کندهار ښاروالۍ د ټولنیزو او کلتوري چارو آمر ټولو ګډون والو ته ښه راغلاست ووایه او د غونډي د موخي او اجنډا په اړه ئې مفصل معلومات وړاندي کړل.
د غونډي په جریان کي ګډونوالو ته د ښاري اوسېدني کلتور د پیاوړتیا او دودولو په موخه یو معلوماتي سمینار وړاندي سو. په دې سمینار کي د عامه پوهاوي په هدف د ښاري فرهنګ اصول، د ښاري ژوند اسانتیاوي او اړوندي مهمي موضوعګاني تشریح سوې.
د سمینار له وړاندي کولو وروسته د تمثیلي کمېټو غړو د موضوعاتو په تړاو آزاد بحث وکړ او همدارنګه خپلو ترتیب سوو پوښتنو ته د مسؤلینو له لوري جوابونه ورکړل سول.
د غونډي په پای کي د ټولنیزو او کلتوري چارو آمر د غونډي وروستۍ ارزونه او پایله وړاندي کړه او ترڅنګ ئې د مکاتبو او مدارسو د تمثیلي کمېټو له غړو وغوښتل چي د خپلو ښوونیزو ادارو له لاري د فرهنګي او ټولنیز پوهاوي د پراخولو لپاره لا ډېري هڅي وکړي.
یاده غونډه د اختتامیه دعا په ویلو سره پای ته ورسېده.
