د کابل بانک سړک د ډامبرولو کار دوام لري
سه شنبه/۶- ۱۲- ۹۸
د کندهار ښار د کابل بانک له سيمي څخه تر ډنډ چوک پوري د غځېدلي سړک ۱۲۵۰۰ متر مربع کنډوکپر ځايونه ډامبرېږي. د دغه سړک قيرريزي پرون/ دوشنبه پيل سوی چي ټاکل سوې تر درو مياشتو پوري بشپړه سي. پر دغه سړک پخوا ۵ سانتي متره قير اچول سوی و، چي له څلوېښتو څخه تر پنځوس ټنه پوري وزن مقاومت يې درلود، خو اوس ۱۰ سانتي متره قير پر اچول کېږي، چي له اتيا څخه تر سلو ټنو پوري وزن مقاومت به ولري. نن پر دغه سړک د لومړۍ طبقې/ ۶ سانتي متره قير اچولو کار له زرغونه انا لېسې څخه تر مهمند روغتون پوري رسېدلی دی. پر دغه سړک دوې طبقې؛ په لومړي وار ۶ سانتي متره او په دوهم وار ۴ سانتي متره قير اچول کېږي. پر دغه پروژه ۱۹ مليونه ۳۷۵ زره افغانۍ د ښاروالي له انکشافي بودجې څخه لګول کېږي. د دې پروژې له برکته په تخميني ډول شاوخوا ۹ زره کاري ورځي کار ايجادېږي. د دغه سړک د قيرولو کار ځکه ځنډول سوی و، چي يو خو هوا ثابته نه وه او بل تخنيکي ټيم غوښتل معلومه کړي چي ستونزه د مځکي په طبقه او که د قير په طبقه کي ده. کندهار ښاروال انجنير محمد رفيع حيات نن د دغي پروژې له کار څخه له نژدې ليدنه کړې ده. ښاروال وويل، پوره هڅه کوي چي دا سړک په اساسي توګه جوړ کړي، څو بيا تخريب نه سي.
