په نهمه ناحيه کي دوه سړکونه ډامبرېږي
يک شنبه/ ۶- سلواغه- ۱۳۹۸
کندهار ښاروالي د ولسي تړون پرمختيايي پروګرام له لاري د کندهار ښار د نهمي ناحيې په دوولسم/ کوتل ګذر کي د شاوليکوټ پمپ شمال خوا ته دوه سړکونه او يو پل په پاخه او اساسي ډول د ۹۶۷۴۹۷۴ افغانيو په لګښت جوړوي.
له دغو ډامبرېدونکو سړکونو څخه يو سړک ۴۶۰ متره اوږدوالی او ۸ متره بر او بل سړک ۳۰۵ متره اوږدوالی او ۱۴ متره بر لري. دغه راز په دغه پروژه کي د يو پله جوړول هم شامل دي، چي ۱۷،۶ متره اوږدوالی او ۸،۱۰ متره بر به ولري. د دې پروژې کار ډېر ژر شروع کېږي او د شپږو مياشتو په موده کي بشپړېږي. له دې پروژې څخه شاوخوا ۹۰۰ کورنۍ په مستقيمه توګه برخمني کېږي.
د دې پروژې قرارداد د يوې آزادي داوطلبۍ په پايله کي يوه خصوصي شرکت سپارل سوی دی. دا پروژه د محل د خلکو تر مستقيم نظارت لاندي پلې کېږي.
